اسلام آباد: سنی اتحاد کونسل کے رہنما صاحبزادہ حامد رضا کے ایکس اکاؤنٹ پر گزشتہ روز جاری ہونے والے بیان پر مختلف سیاسی رہنماؤں نے پاکستان تحریک انصاف (پی ٹی آئی) پر شدید تنقید کی ہے۔

ٹوئٹ میں کہا گیا کہ صاحبزادہ حامد رضا کو جیل میں 111 دن سے زائد ہو چکے ہیں اور کیا ان کے اتحادیوں میں کوئی رہنما ملاقات کے لیے پہنچا؟

ردعمل:

• وزیر مملکت برائے قانون و انصاف بیرسٹر عقیل ملک نے کہا کہ پی ٹی آئی عملاً ایک ہی شخصیت کے گرد محدود دکھائی دیتی ہے۔ کئی اتحادی کئی ماہ سے جیل میں ہیں مگر قیادت کی جانب سے کوئی مؤثر آواز نہیں بلند ہوئی۔
• خیبر پختونخوا اسمبلی میں اپوزیشن لیڈر ڈاکٹر عباد اللہ نے کہا کہ پی ٹی آئی کی سیاست آج نظریے کی نہیں بلکہ ایک شخصیت کی سیاست بن چکی ہے۔ اتحادیوں، رہنماؤں اور کارکنوں کے خاندانوں کا احترام نہیں کیا جا رہا۔
• پاکستان مسلم لیگ (ن) کی رہنما حنا پرویز بٹ نے کہا کہ یہ صرف پارٹی کا نہیں، بلکہ لیڈر کا رویہ ہے، جو قربانی دینے والے دوست کے جنازے میں بھی شریک نہیں ہوا۔
• پاکستان پیپلز پارٹی کی رکن قومی اسمبلی سحر کامران نے بیان دیا کہ یہ خودغرض اور ایک شخص پر مرکوز کلٹ سیاست کی مثال ہے جس میں اتحادیوں، رہنماؤں یا کارکنوں کی کوئی عزت نہیں ہوتی۔

سیاستدانوں کا کہنا ہے کہ پارٹی کی توجہ صرف ایک شخصیت تک محدود ہے جبکہ قربانی دینے والے رہنماؤں اور کارکنوں کی خدمات نظر انداز ہو رہی ہیں۔