کراچی اور بلوچستان میں زلزلے کے جھٹکے، شدت 5.2 ریکارڈ

کراچی اور بلوچستان کے مختلف علاقوں میں آج دوپہر زلزلے کے جھٹکے محسوس کیے گئے۔ زلزلہ پیما مرکز کے مطابق جھٹکے 12 بجکر 51 منٹ پر ریکارڈ کیے گئے، جس کی شدت 5.2 اور گہرائی 12 کلومیٹر بتائی گئی ہے۔ زلزلے کا مرکز کراچی سے تقریباً 87 کلومیٹر دور سومیانی میں تھا۔

کراچی میں آئی آئی چندریگر روڈ، لیاری، صدر، کلفٹن، پی ای سی ایچ ایس اور ڈی ایچ اے کے رہائشیوں نے زلزلے کے جھٹکے محسوس کیے۔ سائٹ ایریا، ٹیپو سلطان روڈ، پہلوان گوٹھ اور بحریہ ٹاؤن میں بھی لوگ خوفزدہ ہو کر باہر نکل آئے۔

پولیس اور ریسکیو ٹیمیں فوری طور پر موقع پر پہنچ گئیں اور لیاری نیا آباد کی عمارتوں کا جائزہ لیا، جہاں کسی نقصان کی اطلاع موصول نہیں ہوئی۔

بلوچستان کے علاقے وندر، حب، گڈانی اور سومیانی میں بھی جھٹکے محسوس کیے گئے۔ چند گھنٹے قبل سبی اور گردونواح میں بھی زلزلہ آیا، جس کی شدت 3.2 ریکارڈ کی گئی تھی اور مرکز سبی کے جنوب مغرب میں 53 کلومیٹر دور تھا۔

ابتدائی طور پر کسی جانی یا مالی نقصان کی اطلاع موصول نہیں ہوئی، اور متعلقہ ادارے صورتحال پر نظر رکھے ہوئے ہیں۔