خیبر پختونخوا کے ضلع لکی مروت میں سکیورٹی فورسز کے آپریشن کے دوران 4 خوارج دہشت گرد ہلاک ہو گئے۔

پاک فوج کے شعبہ تعلقات عامہ (ISPR) کے مطابق یہ آپریشن 18 اور 19 فروری کی درمیانی شب کیا گیا۔ آئی ایس پی آر نے بتایا کہ آپریشن انٹیلیجنس بیسڈ تھا اور بھارتی سرپرست یافتہ فتنہ الخوارج دہشت گردوں کی موجودگی کی اطلاع پر عمل درآمد کیا گیا۔

آپریشن کے دوران سکیورٹی فورسز نے دہشت گردوں کے ٹھکانے کو مؤثر انداز میں نشانہ بنایا، شدید فائرنگ کے تبادلے کے بعد 4 دہشت گرد ہلاک کر دیے گئے۔ ہلاک دہشت گردوں کے قبضے سے اسلحہ اور گولہ بارود بھی برآمد ہوا۔ یہ عناصر علاقے میں متعدد دہشت گرد کارروائیوں میں ملوث تھے۔

آئی ایس پی آر نے مزید کہا کہ علاقے میں کلیئرنس آپریشن جاری ہے اور سکیورٹی فورسز دہشت گردی کے خلاف عزمِ استحکام کے تحت کارروائیاں جاری رکھیں گی۔