نیو یارک: پاکستان سپر لیگ (پی ایس ایل) 2025 کی شروعات کا اعلان نیو یارک میں منعقدہ ایچ بی ایل پی ایس ایل کے روڈ شو کے دوران کر دیا گیا ہے۔ لیگ میچز 26 جنوری سے شروع ہوں گے اور فائنل 3 مئی کو کھیلا جائے گا۔

پی سی بی کے چیئرمین محسن نقوی کے مطابق اس بار 11 میچز کی میزبانی فیصل آباد کرے گا۔ روڈ شو کا مقصد 8 جنوری کو دو نئی ٹیموں کی خریداری میں بین الاقوامی سرمایہ کاروں کو راغب کرنا تھا۔

نیو یارک میں روڈ شو میں پی سی بی چیئرمین محسن نقوی، ٹی ٹوئنٹی کپتان سلمان علی آغا، صائم ایوب، ابرار احمد، فہیم اشرف، سعود شکیل، شان مسعود، سابق کپتان وسیم اکرم، رمیز راجہ اور دیگر نے شرکت کی۔ پاکستان کے سفیر رضوان سعید شیخ نے کہا کہ کھیل سفارت کاری اور ثقافتوں کے تبادلے کا اہم ذریعہ ہیں۔

قومی کرکٹرز نے پی ایس ایل کے تجربات اور نوجوان کرکٹرز کے لیے اس لیگ کی اہمیت پر روشنی ڈالی۔ محسن نقوی نے پی ایس ایل کو دنیا کی نمبر ون لیگ بنانے کا عزم ظاہر کیا، جبکہ وسیم اکرم اور رمیز راجہ کے مطابق یہ لیگ نوجوان کھلاڑیوں کے لیے بہترین پلیٹ فارم ہے۔

اس موقع پر کراچی کے نیشنل اسٹیڈیم کی جدید کاری کے ساتھ مظفرآباد اور حیدر آباد اسٹیڈیمز کو بھی آباد کرنے کا منصوبہ بنایا گیا ہے، تاکہ مستقبل میں میچز کے لیے سہولیات مزید بہتر ہوں۔