کراچی: رواں سال 51 ہزار پاکستانی مسافروں کو طیاروں سے آف لوڈ کیا گیا، جس کے نتیجے میں پاکستانی پاسپورٹ کی عالمی رینکنگ میں بہتری دیکھی گئی ہے۔ قومی اسمبلی کی قائمہ کمیٹی برائے اوورسیز پاکستانیز اور انسانی حقوق کے اجلاس میں ڈی جی ایف آئی اے نے بتایا کہ پاکستانی پاسپورٹ 118 ویں نمبر سے بہتر ہو کر 92 ویں نمبر پر آ گیا ہے۔

ڈی جی ایف آئی اے کے مطابق اس سال سعودی عرب میں 24 ہزار پاکستانی بھیک مانگنے کی وجہ سے ڈی پورٹ ہوئے۔ زیادہ تر لوگ عمرے کے نام پر سعودی عرب جا کر یورپ جانے کی کوشش کرتے ہیں۔ دبئی نے 6 ہزار پاکستانی، اور آذربائیجان نے 2,500 پاکستانی مسافروں کو بھیک مانگنے پر واپس بھیجا۔

ان کے مطابق رواں سال تقریباً 24 ہزار افراد کمبوڈیا گئے، جن میں سے 12 ہزار تاحال واپس نہیں آئے، جبکہ برما میں سیاحتی ویزے پر جانے والے 4 ہزار افراد میں سے 2,500 واپس نہیں آئے۔ ایک جعلی فٹ بال کلب کے ذریعے جاپان بھیجے گئے فٹ بال ٹیم کے ارکان میں ایک لنگڑا شخص بھی شامل تھا۔

ڈی جی ایف آئی اے نے مزید بتایا کہ بنگالی شہری بھی پاکستان سے غیر قانونی طور پر یورپ جانے کی کوشش کرتے ہوئے پکڑے گئے ہیں۔

یہ اقدام پاکستانی مسافروں کی غیر قانونی سرگرمیوں پر قابو پانے اور پاسپورٹ کی ساکھ کو بہتر بنانے کے لیے ضروری سمجھا جا رہا ہے۔