اسلام آباد: وزیر اعظم شہباز شریف کے ترجمان مشرف زیدی نے پی ٹی آئی رہنماؤں کے عمران خان کو ’قید تنہائی‘ میں رکھنے کے الزامات کو مسترد کردیا ہے۔ برطانوی نشریاتی ادارے اسکائی نیوز سے گفتگو میں مشرف زیدی نے کہا کہ عمران خان قریب 860 روز سے جیل میں ہیں اور اصولاً ہر ہفتے انہیں ایک ملاقات کی اجازت ہونی چاہیے، مگر انہوں نے 112 ہفتوں کے دوران 870 ملاقاتیں کی ہیں۔

ان ملاقاتوں میں عمران خان نے اپنی بہنوں علیمہ، عظمیٰ اور نورین سے لگ بھگ 140 ملاقاتیں کیں، جبکہ وکلاء سے 451 ملاقاتیں اور 30 سے زیادہ مرتبہ ڈاکٹروں کے ذریعے طبی معائنہ بھی کروایا گیا۔ مشرف زیدی نے واضح کیا کہ یہ ملاقاتیں کسی فوجی ڈاکٹر کی نگرانی میں نہیں بلکہ ذاتی معالج کے ذریعے کی گئیں۔

انہوں نے مزید کہا کہ ملاقات کے دوران سیاسی امور پر بات چیت کی اجازت نہیں دی جاتی اور جیل میں رہتے ہوئے عمران خان کے ایکس اکاؤنٹ سے 775 پیغامات جاری کیے گئے۔

مشرف زیدی کے مطابق یہ اعداد و شمار ظاہر کرتے ہیں کہ عمران خان ’قید تنہائی‘ میں نہیں ہیں، اور ملاقاتوں اور طبی معائنے کے مکمل انتظامات موجود ہیں۔