اسلام آباد: وزیر مملکت برائے داخلہ طلال چوہدری نے کہا ہے کہ پی ٹی آئی سوشل میڈیا پر منظم طریقے سے ملکی اداروں کے خلاف مہم چلا رہی ہے اور اگر کوئی شخص ملک کے خلاف بننے والے ٹرینڈز کا حصہ بنتا ہے تو اسے قانونی کارروائی کا سامنا کرنا پڑ سکتا ہے۔

اسلام آباد میں پریس کانفرنس کے دوران طلال چوہدری نے کہا کہ دہشت گرد تنظیمیں اور کچھ عناصر ملکی سلامتی کے لیے خطرہ ہیں اور سوشل میڈیا کا استعمال کر رہے ہیں۔ انہوں نے واضح کیا کہ حکومت آزادی اظہار رائے پر یقین رکھتی ہے، لیکن ملکی اداروں کے خلاف مذموم مہم چلانے کی اجازت نہیں دی جائے گی۔

طلال چوہدری نے مزید کہا کہ پی ٹی آئی کے اکاؤنٹس بیرون ملک سے چلائے جا رہے ہیں، اور دہشت گرد تنظیم بی ایل اے کے ٹرینڈز بھی سوشل میڈیا پر بنائے جاتے ہیں۔ ہر ایک پیغام، ہیش ٹیگ یا ٹرینڈ کے لیے رقم وصول کی جاتی ہے، اور لوگ سوشل میڈیا پر ٹرینڈز بنا کر پیسے لیتے ہیں۔

وزیر مملکت نے خبردار کیا کہ ملک کے خلاف ٹرینڈز میں شامل ہونے والے افراد کے خلاف قانونی کارروائی کی جائے گی، اور بیرون ملک بیٹھی کمپنیوں کے ذریعے چلائے جانے والے اکاؤنٹس کے نام بدلنے سے بھی کسی کو قانونی تحفظ نہیں حاصل ہوگا۔