کراچی: شہر کے علاقے ناظم آباد میں پولیس نے قادری ہاؤس پر چھاپہ مار کر بھتہ خوری کی متعدد وارداتوں میں ملوث 9 ملزمان کو گرفتار کر لیا۔

ایس ایس پی ایس آئی یو عمران احمد خان کے مطابق کارروائی بھتہ خور گروپ وصی اللہ لاکھو اور عبدالصمد کاٹھیار واڑی کے خلاف گرفتار ملزمان کی نشاندہی پر کی گئی۔ چھاپے کے دوران 3 بھتہ خور اور 3 شوٹرز سمیت مجموعی طور پر 9 ملزمان کو گرفتار کیا گیا، جن میں سے 8 کا سابقہ کرمنل ریکارڈ بھی سامنے آیا ہے۔

ایس ایس پی کے مطابق گرفتار ملزمان جمشید روڈ پر واقع ایک کار شوروم پر بھتہ وصولی کے لیے فائرنگ کے واقعے میں بھی ملوث رہے ہیں۔ پہلے سے گرفتار ملزم ریحان الدین کی نشاندہی پر ناظم آباد میں کارروائی کی گئی، جو انٹیلی جنس معلومات اور تکنیکی شواہد کی بنیاد پر انجام دی گئی۔

عمران احمد خان نے بتایا کہ ملزم ریحان الدین بھتہ خوری کے ایک کیس میں 4 سال تک جیل میں رہا ہے جبکہ اس نے ایک الیکشن میں بھی حصہ لیا تھا۔

ایس ایس پی ایس آئی یو کے مطابق ثروت اعجاز قادری کے گھر پر چھاپے کے دوران ملزمان کو حراست میں لیا گیا، تاہم چونکہ گرفتاریاں ایک حساس مقام سے ہوئیں اس لیے معاملہ نازک ہو گیا۔ انہوں نے واضح کیا کہ حالیہ واردات میں کسی دوسرے گروہ کا نام سامنے آ رہا ہے اور سنی تحریک کے رہنماؤں کا اس معاملے سے کوئی تعلق نہیں۔

انہوں نے مزید بتایا کہ تفتیش کے دوران جن افراد کے نام سامنے آئے انہیں گرفتار کیا گیا، اب تک 17 ملزمان حراست میں ہیں اور تمام سے مزید تفتیش جاری ہے۔ اگر کوئی شخص دانستہ طور پر کسی ملزم کو پناہ دینے میں ملوث پایا گیا تو اس کے خلاف بھی قانونی کارروائی کی جائے گی۔