پشاور: خیبرپختونخوا میں سابق صوبائی وزراء اور معاونین کی جانب سے سرکاری گاڑیوں کی واپسی کا معاملہ تاحال حل نہ ہو سکا ہے۔

ذرائع کے مطابق صوبے کے کئی سابق وزراء اور معاونین نے متعدد سرکاری گاڑیاں ابھی تک متعلقہ محکموں کو واپس نہیں کیں۔ دستیاب دستاویزات کے مطابق ریسکیو 1122 کی تین سرکاری گاڑیاں سابق معاون خصوصی برائے ریلیف نیک محمد کے زیر استعمال ہیں۔

ذرائع کا کہنا ہے کہ گاڑیوں کی واپسی کے لیے ریسکیو 1122 کی جانب سے باقاعدہ تحریری درخواست بھی دی جا چکی ہے، تاہم تاحال گاڑیاں واپس نہیں کی جا سکیں۔ مزید یہ کہ ریسکیو 1122 کی ایک سرکاری گاڑی اس وقت اسلام آباد پولیس کی تحویل میں بھی موجود ہے۔

ذرائع کے مطابق کئی سابق کابینہ اراکین نے اپنے سرکاری دفاتر کو تالے لگا رکھے ہیں، جس کے باعث سرکاری املاک کی واپسی میں مزید رکاوٹیں پیدا ہو رہی ہیں۔

اس معاملے پر جب معاون خصوصی برائے اطلاعات شفیع جان سے مؤقف لینے کی کوشش کی گئی تو انہوں نے تبصرہ کرنے سے گریز کیا۔