وزیراعلیٰ خیبر پختونخوا نے شہید فورسز کے ورثاء کے لیے مالی امداد میں اضافہ کر دیا

پشاور: وزیراعلیٰ خیبر پختونخوا سہیل آفریدی نے مئی 2025 کے بھارتی بزدلانہ حملے میں شہید ہونے والے فورسز کے ورثاء کے لیے مالی امداد میں اضافہ کا اعلان کیا۔

وزیراعلیٰ سہیل آفریدی سے شہداء کے ورثاء کی ملاقات ہوئی اور انہوں نے کہا کہ خیبر پختونخوا حکومت شہداء کے اہلخانہ کے ساتھ ہر قدم پر شانہ بشانہ کھڑی ہے۔

وزیراعلیٰ کے مطابق کابینہ کی منظوری سے شہداء کے ورثاء کے لیے منظور شدہ 50 لاکھ روپے کی رقم میں مزید 50 لاکھ روپے کا اضافہ کیا گیا ہے، جبکہ جنگ میں زخمی ہونے والے اہلکاروں کے لیے امداد 10 لاکھ سے بڑھا کر 25 لاکھ روپے کر دی گئی ہے۔

سہیل آفریدی نے کہا کہ خیبر پختونخوا کے عوام کی قربانیاں ملک و قوم کی سلامتی کی ضمانت ہیں اور حق کی راہ میں شہید کبھی نہیں مرتے۔ انہوں نے شہداء کو قوم کا فخر قرار دیتے ہوئے کہا کہ حکومت ان کے ورثاء کا بھرپور خیال رکھے گی۔