شکارپور ضلع کے علاقے منچر شاہ اور گردونواح میں پولیس اور رینجرز نے بڑے پیمانے پر آپریشن کیا، جس کے دوران فائرنگ کے تبادلے میں 9 ملزمان ہلاک ہوگئے، جبکہ دو ڈی ایس پیز سمیت چار اہلکار زخمی ہوگئے۔

واقعے میں ڈی ایس پی پارس جکراونی، ڈی ایس پی ظہور احمد سومرو اور دو پولیس اہلکار زخمی ہوئے، جنہیں فوری طور پر اسپتال منتقل کردیا گیا۔

پولیس کے مطابق ہلاک ہونے والے ملزمان کی شناخت کرلی گئی ہے۔ مارے جانے والوں میں امداد شیخ، شہزادو شیخ، شہمور شیخ، صابر شیخ، گل محمد عرف کراڑو شیخ، اویس شیخ، ساجد، ایاز شیخ اور غلام محمد شامل ہیں۔

علاقے میں سیکیورٹی کی بہتری کے لیے آپریشن جاری رکھا جائے گا۔

پولیس کے مطابق جائے وقوعہ پر بھاری نفری موجود ہے جبکہ آپریشن میں بکتر بند گاڑیاں بھی استعمال کی جارہی ہیں۔

مقابلے میں زخمی ہونے والی ڈی ایس پی پارس بکھرانی کی حالت اب بھی تشویشناک بتائی جارہی ہے۔

اسپتال ذرائع کا کہنا ہے کہ ڈی ایس پی آپریشن تھیٹر میں موجود ہیں جبکہ کراچی سے ڈاکٹرز بھی طلب کیے گئے ہیں۔

دوسری جانب ڈی آئی جی سکھر فیصل عبداللہ چاچڑ زخمی ڈی ایس پی پارس بکھرانی، ان کے زخمی شوہر ظہور سومرو اور دیگر اہلکاروں کی عیادت کے لیے اسپتال پہنچے۔

میڈیا سے گفتگو کرتے ہوئے انہوں نے بتایا کہ ڈی ایس پی پارس بکھرانی سمیت تمام زخمیوں کی حالت بہتر ہورہی ہے۔

انہوں نے بتایا کہ پارس بکھرانی کو کولہے سے اوپر گولی لگی، جبکہ ڈی ایس پی ظہور سومرو کو پیٹ میں لگنے والی گولی سائیڈ سے نکل گئی۔