تھرپارکر: صحرائے تھر سے تعلق رکھنے والے سرکاری اسکول کے ریٹائرڈ استاد سکھ رام داس نے 79 سال کی عمر میں جامعہ کراچی سے قانون کی ڈگری حاصل کر کے یہ ثابت کر دیا کہ علم کے حصول کے لیے عمر کوئی رکاوٹ نہیں۔

سکھ رام داس، جو 8 بیٹوں اور ایک بیٹی کے والد ہیں، نے 74 سال کی عمر میں جامعہ کراچی کے شعبہ قانون میں داخلہ لیا اور 5 سال کی محنت کے بعد 79 برس کی عمر میں قانون کی ڈگری حاصل کی۔

ان کا تعلق تحصیل ڈیپلو کے گاؤں ہیلاریو پیر سے ہے۔ انہوں نے کہا کہ قانون کی ڈگری حاصل کرنے کا مقصد نہ صرف اپنی ذاتی دلچسپی ہے بلکہ اپنے علاقے کے غریب عوام کو زمینوں سمیت دیگر مسائل کے حل میں مدد فراہم کرنا بھی ہے۔

سکھ رام داس نے ثابت کیا کہ مشکلات اور رکاوٹوں کے باوجود علم کی طلب اور عوام کی خدمت کا جذبہ عمر کے کسی بھی مرحلے میں جاری رہ سکتا ہے۔ ان کی کامیابی نئی نسل کے لیے ایک عملی مثال ہے کہ سیکھنے کا کوئی وقت مقرر نہیں ہوتا اور ہر عمر میں علم حاصل کیا جا سکتا ہے۔