چنیوٹ: پاکستان پیپلزپارٹی کے چیئرمین بلاول بھٹو زرداری نے سابق ڈی جی آئی ایس آئی فیض حمید کے خلاف فوجی عدالت کے فیصلے کو تاریخی قرار دیتے ہوئے کہا ہے کہ آج کے فیصلے سے واضح پیغام گیا ہے کہ فیض حمید غیر قانونی کام کر رہے تھے۔

میڈیا سے گفتگو کرتے ہوئے بلاول بھٹو زرداری نے کہا کہ فیض حمید کے خلاف مزید ٹرائل جاری ہے اور ان کے پاس اپیل کے لیے بھی فورمز موجود ہیں۔

چیئرمین پی پی پی نے خیبرپختونخوا میں گورنر راج پر کہا کہ اس حوالے سے کوئی باقاعدہ بات نہیں ہوئی اور پی ٹی آئی اپنے طرزعمل سے وفاق کو مجبور کرنے کی کوشش کر رہی ہے۔

انہوں نے پی ٹی آئی کے دور حکومت پر تنقید کرتے ہوئے کہا کہ مریم نواز اور فریال تالپور کو ٹارگٹ کیا گیا، اور آج عمران خان خود جیل میں ہیں، یہ مکافات عمل ہے۔ بلاول بھٹو نے کہا کہ بانی پی ٹی آئی نے سیاست میں غلط روایات ڈالیں اور نفرت و انتشار کی سیاست کو فروغ دیا۔

چیئرمین پی پی پی نے کہا کہ پیپلزپارٹی کے نظریے اور منشور کی جیت کے طور پر آئینی عدالت کا قیام بڑی کامیابی ہے۔ انہوں نے وفاق کی مشکلات دور کرنے اور صوبوں کے اختیارات کم کیے بغیر عوام کے لیے ریلیف فراہم کرنے کی ضرورت پر زور دیا۔