اسلام آباد: صدرِ مملکت آصف علی زرداری نے وفاقی آئینی عدالت کو وفاقی شرعی عدالت کی عمارت میں منتقل کرنے کی منظوری دے دی ہے اور اس حوالے سے نوٹیفکیشن جاری کر دیا گیا ہے۔

نوٹیفکیشن کے مطابق وفاقی آئینی عدالت کو موجودہ وفاقی شرعی عدالت کی عمارت میں منتقل کیا جائے گا، جبکہ شرعی عدالت کو اسلام آباد ہائی کورٹ میں منتقل کرنے کا فیصلہ کیا گیا ہے۔

قبل ازیں وفاقی آئینی عدالت اسلام آباد ہائی کورٹ کی عمارت میں قائم کی گئی تھی، جہاں چیف جسٹس آئینی عدالت جسٹس امین الدین خان اور دیگر ججوں نے مقدمات کی سماعت شروع کی تھی۔

خیال رہے کہ 27ویں آئینی ترمیم کے تحت سپریم کورٹ کے آئینی بینچ کے بجائے الگ سے وفاقی آئینی عدالت بنانے کی منظوری دی گئی تھی، جس کے بعد جسٹس امین الدین خان کو آئینی عدالت کا چیف جسٹس مقرر کیا گیا اور دیگر ججوں کی تعیناتی کی گئی۔