چینیوٹ: چیئرمین پاکستان پیپلز پارٹی بلاول بھٹو زرداری نے کہا ہے کہ سابق ڈی جی آئی ایس آئی لیفٹیننٹ جنرل (ر) فیض حمید کو سزا ملنے کا فیصلہ تاریخی ہے، جو اس بات کا واضح پیغام ہے کہ مستقبل میں طاقت کے نشے میں غلطیاں کرنے والوں کو باز رہنا چاہیے۔

میڈیا سے گفتگو کرتے ہوئے بلاول بھٹو کا کہنا تھا کہ بانی پی ٹی آئی اور فیض حمید دونوں اپنے وقت کے "فرعون" تھے، جو ریاستی طاقت کے زعم میں حدود سے تجاوز کرتے رہے۔

انہوں نے کہا کہ بانی پی ٹی آئی طاقت کے نشے میں دھمکیاں دیتے تھے اور آج خود مکافاتِ عمل کا سامنا کرتے ہوئے جیل میں ہیں، جبکہ فیض حمید کو بھی اپنے اقدامات کی سزا مل چکی ہے۔

بلاول نے مزید کہا کہ فیض حمید نے اپنے عہدے کا حلف توڑا اور آئینی فرائض کی خلاف ورزی کی، اور آج ان کے اعمال کا جواب انہیں مل رہا ہے۔

ایک سوال کے جواب میں انہوں نے واضح کیا کہ خیبر پختونخوا میں گورنر راج سے متعلق پیپلز پارٹی اور مسلم لیگ ن کے درمیان کوئی گفتگو نہیں ہوئی، تاہم انہوں نے کہا کہ پی ٹی آئی خود ایسے حالات پیدا کر رہی ہے کہ وفاقی حکومت کو مجبوراً سخت اقدامات کرنے پڑیں۔