پشاور: خیبرپختونخوا حکومت نے نگران دور میں پی ٹی آئی کے اراکین اور کارکنان پر درج کچھ مقدمات واپس لینے کی تیاری مکمل کر لی ہے۔

سرکاری ذرائع کے مطابق نگران دور کے دوران 9 اور 10 مئی کے واقعات کے سلسلے میں پی ٹی آئی کے اراکین اور کارکنان پر مقدمات درج ہوئے تھے۔ ایڈووکیٹ جنرل خیبرپختونخوا نے صوبائی کابینہ کو 51 مقدمات واپس لینے کی سفارشات بھیج دی ہیں۔

ایڈووکیٹ جنرل شاہ فیصل اتمان خیل نے جیو نیوز سے گفتگو کرتے ہوئے کہا کہ مقدمات میں سزا کی صورت میں اراکین اسمبلی کی نااہلی کا خدشہ تھا، اس لیے مقدمات واپس لینے کی سفارشات تیار کی گئی ہیں۔

ان کے مطابق پی ٹی آئی کے خلاف کل 319 مقدمات درج تھے، جن میں سے اب صرف 51 مقدمات زیر غور ہیں۔ صوبائی کابینہ کی منظوری کے بعد عدالتوں سے مقدمات واپس لینے کی کارروائی شروع کی جائے گی، اور ریاست مقدمات سے دستبرداری کی منظوری کے بعد دعویداری ختم کر دے گی۔