لاہور: پنجاب کی سینئر وزیر مریم اورنگزیب نے کہا ہے کہ پرتشدد اور انتشار کی سیاست پاکستان تحریک انصاف (پی ٹی آئی) کی عادت ہے۔

نیوز کانفرنس سے خطاب میں انہوں نے کہا کہ جب اداروں پر حملہ ہوتا ہے تو ادارے ردعمل دیتے ہیں، اور دوبارہ کسی کو 9 مئی جیسی صورتحال پیدا کرنے کی اجازت نہیں دی جائے گی۔

مریم اورنگزیب نے مزید کہا کہ ایسے عناصر کے ساتھ قومی سلامتی کے دشمنوں جیسا سلوک کیا جائے گا۔

سینئر صوبائی وزیر نے کہا کہ اگر کوئی ملک دشمن کے ساتھ تعلقات بنا کر ملک دشمنی کرے گا تو یہ آزادی اظہار رائے نہیں بلکہ ملک دشمنی ہے۔

انہوں نے کہا کہ ذہنی مریض کے ساتھ ذہنی ڈاکٹر بات کر سکتا ہے، لیکن ایسے عناصر کو سمجھانے کی کوشش کرنے پر وہ صرف گالی دیتے ہیں۔