پاک فوج کے شعبہ تعلقات عامہ (آئی ایس پی آر) کے مطابق سکیورٹی فورسز نے 6 دسمبر کو قلات میں ایک کامیاب آپریشن انجام دیتے ہوئے بھارتی سرپرستی یافتہ 12 دہشتگردوں کو ہلاک کر دیا۔

آپریشن خفیہ معلومات کی بنیاد پر کیا گیا اور دہشتگردوں کے ٹھکانے کو مؤثر انداز میں نشانہ بنایا گیا۔ شدید فائرنگ کے تبادلے کے دوران دہشتگرد مارے گئے، اور ان سے اسلحہ، گولہ بارود اور بارودی مواد بھی برآمد ہوا۔

آئی ایس پی آر نے بتایا کہ ہلاک دہشتگرد علاقے میں متعدد کارروائیوں میں ملوث تھے، اور کسی بھی دیگر بھارتی سرپرست دہشتگرد کے خاتمے کے لیے کلیئرنس آپریشن جاری ہے۔

وزیراعظم شہباز شریف نے آپریشن کو کامیاب قرار دیتے ہوئے سکیورٹی فورسز کو خراج تحسین پیش کیا اور کہا کہ عزم استحکام کے وژن کے تحت دہشتگردی کے خلاف یہ کامیابیاں جاری رہیں گی۔

وزیراعظم نے مزید کہا کہ پوری قوم افواج پاکستان کے ساتھ کھڑی ہے اور ملک سے ہر قسم کی دہشتگردی کے مکمل خاتمے کے لیے پرعزم ہے۔

آئی ایس پی آر نے واضح کیا کہ سکیورٹی فورسز اور قانون نافذ کرنے والے ادارے بیرونی حمایت یافتہ دہشتگردی کے مکمل خاتمے کے لیے مسلسل کارروائیاں جاری رکھیں گے۔